Nagkahiusa ang mga matag pamilya sa mga Overseas Filipino Workers (OFWs) sa usa ka OFW Family Fun Run nga gipasiugdahan sa Overseas Workers Welfare Administration (OWWA) Dipolog City Field Office, kaniadtong Oktubre 25, 2025.
Ang maong kalihokan, nga may temang “Step in Strength, Mile of Love,” gipahigayon atubangan sa City Hall sa Dapitan City ug nagtigom sa daghang partisipante gikan sa nagkalain-laing barangay ug sektor sa komunidad.
Ang kalihokan gilaraw dili lamang isip usa ka sports event, apan usa usab ka selebrasyon sa pagkahiusa, gugma, ug kahimsog sa pamilya. Gitambongan kini sa mga ginikanan, kabatan-onan, ug kabataan nga nagpakita sa kadasig ug kalipay samtang nagdagan uban sa ilang mga hinigugma, dala ang mensahe sa panaghiusa ug pagpalig-on sa relasyon sa matag pamilya sa OFW.
Sumala sa mga opisyal sa OWWA, tuyo sa kalihokan nga lig-onon ang panag-uban ug maayong relasyon sa mga pamilya sa mga OFW, nga giila isip mga modernong bayani sa nasud.
Nagpahayag usab sa ilang dakong pagpasalamat ang OWWA Dipolog City Field Office sa tanang kauban ug mga sponsor nga naghatag og suporta sa maong kalihokan.
Nahuman ang fun run nga gibati sa tanan ang kalipay ug pagpasalamat samtang nagpadayon ang pagpasidungog sa mga OFW ug sa ilang pamilya nga padayon nga nagpaningkamot alang sa kaayohan ug kalamboan sa nasud.(IKEN B. GULLEM)