Tugpa sa prisohan ang usa ka mag-uuma nga na aktohang nagpataya sa iligal nga sugal, nga gitawag nga Warik-Warik ug mas naila sa tawag nga Swertres, tungod sa gipahigayon nga Intelligence-driven Operation batok sa Iligal nga Sugal, didto sa Purok 3, sa Barangay Poblacion, Lungsod sa Sibutad, ning Probinsiya sa Zamboanga Del Norte, niadtong nakalabay’ng adlaw, Agusto 04, 2025 sa may alas 4:20 sa hapon.
Giila sa Sibutad Pnp ang dinakpan sa alyas nga Buyong, 46 anyos nga Lalaking Mag-uuma, ug Lumolupyo sa Purok 4, sa Barangay Poblacion, sa nasangpit nga Lungsod ug Probinsiya, diin Posetibong nakuhaan ang naasoy nga Suspect og 3 ka Tally Sheet’s, nga maoy Gisulatan sa mga Gitay-an nga mga Numero sa mga Tayador, lakip na niini ang Ballpen, ug ang kantidad nga mokabat ngadto sa Php300.00 sa nagkadaiyang mga Denominasyon, nga matud pa, ang maong kantidad, gikan sa mga Tayador nga Mitaya sa nasangpit nga Iligal nga sugal.
Human sa pagkasikop sa nahisgutang Suspect, gidala una kini ngadto sa Sibutad Municipal Hospital alang sa Medical and Physical Examination, pagkahuman largo dayon kining gidala ngadto sa Sibutad MPS, alang na sa dokumintasyon ug tukmang disposasyon.(Julius Esmade)
Source: ZNPPO