Nahatagan na og mas kasaligan nga agianan ang mga residente sa Barangay Jatian ug silingang mga lugar sa Sibuco, Zamboanga del Norte human mapahuman sa Department of Public Works and Highways DPWH Zamboanga del Norte 4th District Engineering Office ang rehabilitasyon sa spillway ug approach sa maong barangay.
Ang nahuman nga proyekto gilauman nga makatabang sa adlaw-adlaw nga transportasyon sa mga residente ilabina sa pagdala sa mga produkto ug serbisyo ngadto sa ubang lugar. Mas napadali usab ang pagbiyahe bisan panahon sa dili maayong kondisyon sa panahon diin delikado kaniadto ang pagtabok sa spillway.
Matud pa sa usa ka residente, dako ang kausaban nga dala sa proyekto tungod kay dili na sila parehas kaniadto nga mahadlok moagi panahon sa kusog nga ulan ug pagbaha.
Sumala sa DPWH, kabahin kini sa ilang padayong paningkamot sa paghatag og imprastraktura nga makapalig-on sa koneksyon sa mga komunidad ug makahatag og mas luwas nga pagbiyahe sa katawhan.(IKEN B. GULLEM)
Source: DPWH REGION IX ZAMBOANGA PENINSULA