Malampusong giluwas sa Coast Guard Sub-Station (CGSS) Dipolog, kauban ang CG K9 Dipolog, CDRRMO Dipolog, BFAR Dipolog, ug PNP Maritime, ang usa ka lumod (dolphin) nga nasangit daplin sa baybayon sa Miputak, Dipolog City.
Nahitabo ang operasyon human madawat sa Coast Guard ang usa ka taho bahin sa stranded nga dolphin. Dali nga mitubag ang CGSS Dipolog pinaagi sa pagpadala sa ilang rescue team ngadto sa dapit.
Pag-abot sa lugar, gisusi sa marine experts ug kauban nga ahensya ang kondisyon sa dolphin, gihatagan kini dayon ug initial care, ug gihatud kini balik sa lawom nga bahin sa dagat aron masiguro ang kaluwasan niini.
Gipasidunggan ang paspas ug tinagsa nga aksyon sa mga personahe nga nagpakita sa ilang hugot nga pagpanalipod sa marine life ug pag-atiman sa kinaiyahan.
Matud sa CGSS Dipolog, ang kalihukan usa ka timaan sa bayanihan ug lig-on nga koordinasyon tali sa mga ahensya ug lokal nga komunidad alang sa pagpanalipod sa kinaiyahan ug kadagatan.(IKEN B. GULLEM)