Naingon nga dako ang pag-uswag sa implementasyon sa Katarungang Pambarangay sa pipila ka barangay sa Dipolog City, sumala sa City Assessment Team alang sa 2026 Lupong Tagapamayapa Incentives Awards. Ang team gilangkuban sa mga representante gikan sa DILG, PNP, DOJ, MTCC, Liga ng mga Barangay, ug Civil Society Organization.
Lakip sa gi-assess ug gidayeg ang Barangays Barra, Biasong, Estaka, Minaog, Olingan, Sinaman, ug Sta. Filomena tungod sa epektibong pamaagi sa paghusay sa mga panaglalis. Tungod sa dali nga pagresolba sa mga kaso, mikunhod ang gidaghanon sa mga konflikto nga natala sa ilang rekord.
Sumala sa assessment team, ang inspirasyon gikan sa Annual LTIA sa DILG nakapadasig sa mga Punong Barangay nga padayon nga pauswagon ang ilang sistema aron magpabiling compliant ug ehemplong barangay sa pagpatuman sa Katarungang Pambarangay.
Gipahibalo usab nga ang Barangays Cogon, Central, Dicayas, Diwan, Gulayon, Lugdungan, Sangkol, ug San Jose awtomatikong dili apil sa assessment tungod kay ubos sa napulo ang ilang kaso sa calendar year 2025, subay sa giya sa programa. Ang team misaad nga magpadayon sa paghatag og teknikal nga tabang sa tanang Lupong Tagapamayapa sa siyudad.(JENIFFER JR. DELICA)
Source: DILG Dipolog