Pormal nga nanumpa si Ms. Lourdes Gale Wong isip bag-ong miyembro sa Sangguniang Bayan sa Katipunan, Zamboanga del Norte, sa usa ka seremonyang puno sa paghinumdum ug pagpasidungog nga gipahigayon sa Office of the Governor, kaniadtong Oktubre 21, 2025.
Si Ms. Wong mao ang mipuli sa bakanteng puwesto nga gibiyaan sa iyang amahan, ang minahalon ug tinalahuron nga si Konsehal Willie Wong, nga namatay niadtong miaging bulan. Pinaagi sa iyang pagpanumpa, misunod siya sa tiilan sa iyang amahan nga nailhan tungod sa matinahuron ug mapadayong pagserbisyo publiko alang sa mga Katawhan sa Katipunan.
Sa maong higayon, nagpakita usab sa ilang suporta ang iyang inahan nga si Mrs. Maripet Revilla Wong, uban sa iyang mga igsoon, nga mitambong aron ipaambit ang kalipay ug garbo sa bag-ong yugto sa ilang pamilya.
Sa iyang pamahayag, nagpasalamat si Ms. Wong sa pagsalig nga gihatag kaniya ug misaad nga mag-alagad uban sa integridad, kalooy, ug pagkamapadayonon, aron ipadayon ang panulondon sa serbisyo publiko nga gisugdan sa iyang amahan.(Iken B. Gullem)
Photo courtesy: Zamboanga del Norte Provincial News Network