Nasaksihan sa Dapitan City ang usa ka makasaysayanong kalihokan sa sports human malampusong gipahigayon ang kauna-unahang Descent: Longboard Downhill Competition 2026 sa Zamboanga Peninsula isip kabahin sa selebrasyon sa Kinabayo Festival 2026.
Sulod sa duha ka adlaw nga kompetisyon nga gisugdan niadtong Hulyo 17, gipakita sa mga longboard riders ang ilang kahanas, kaisog, ug kontrol sa paglusad sa downhill course sa Barangay Sto. Niño, Dapitan City.
Mitambong ang mga partisipante gikan sa nagkalain-laing lugar sa nasud, lakip ang Iligan City, Cagayan de Oro City, Davao City, Butuan City, Buenavista, Dumaguete City, Cebu, Ipil, Bukidnon, Manolo Fortich, Negros, Alegria sa Surigao, ug Dapitan City, nga nakahatag og dugang nga kahinam sa maong kalihokan.
Kini nga kalihokan giorganisar sa Zamboanga del Norte Longboarding Community, aron mapasiugda ang longboarding ug mapalapad ang kahigayonan alang sa extreme sports sa rehiyon.
Nahuman ang maong kompetisyon niadtong Hulyo 18, nga nagbilin og usa ka bag-ong milestone sa Kinabayo Festival ug nagbukas og mas daghang oportunidad alang sa pagpalambo sa extreme sports sa Zamboanga Peninsula.(IKEN B. GULLEM)
Source: City Information Division- Dapitan