DAVAO CITY – Gidili sa pagkakaron ang pag-agi sa tanang matang sa sakyanan sa bahin sa Davao–Bukidnon Road sa Purok 39, Sitio Marahan, Marilog Proper human mahugno ang usa ka seksyon sa karsada tungod sa padayon nga kusog nga pag-ulan.
Sa advisory sa Department of Public Works and Highways (DPWH) Region XI, giingong dili pa luwas nga maagian ang maong lugar samtang nagpadayon ang inspeksyon ug pag-assess sa kadaot sa dalan.
Samtang wala pa mabuksan ang apektadong bahin sa karsada, gitugotan ang mga light vehicles sa paggamit sa alternatibong ruta nga Davao–Bukidnon Road – Datu Ladayon – Katipunan – Campo Uno.
Gipahimangnoan usab sa DPWH ang tanang motorista nga magmatngon sa ilang biyahe, mosunod sa mga traffic advisory, ug likayan ang apektadong lugar hangtod nga mopahibalo ang mga otoridad nga luwas na kining maagian.(Camille Santos Naraga)(Source: DPWH Region XI)