Dili lang compliance kundili long-term sustainability sa kooperatiba ang gipunting sa Department of Agrarian Reform (DAR) Zamboanga del Norte atol sa governance ug management training alang sa mga opisyal sa Pitogo Gutalac Agrarian Reform Cooperative sa Barangay Pitogo.
Gibansay sa DAR ang mga opisyal sa kooperatiba sa maayong pagdumala, financial accountability, risk management, ug digitalization aron mapalig-on ang operasyon sa organisasyon ug maandam kini sa dugayng panahon nga pagserbisyo sa komunidad.
Gipangulohan ang aktibidad nila Provincial Agrarian Reform Program Officer II Daisy Dell Suan Digamon ug PARPO I Engr. Alfonso A. Tan, uban sa technical team nga sila SARPO Christy P. Gonzales, ARPO I Runa Jane B. Sabac, ug Maureen Kaye T. Soropia.
Matud sa DAR, importante nga adunay lig-on nga liderato ug organisadong sistema aron mahimong independent ug mas epektibo ang mga agrarian reform cooperatives sa pagdumala sa ilang mga proyekto ug benepisyo para sa mga miyembro.
Gipasiugda usab sa ahensya nga pinaagi sa CDA-accredited training, mas mapalambo ang transparency ug partisipasyon sa mga miyembro sa paghimo og desisyon sulod sa kooperatiba.
Ang Pitogo Gutalac Agrarian Reform Cooperative opisyal nga narehistro isip kooperatiba niadtong Agosto 2025, nga giila nga dakong milestone sa pagpalig-on sa organisasyon ug sa padayon nga paningkamot alang sa self-reliance sa mga miyembro niini.(IKEN B. GULLEM)
Source: DAR ZAMBOANGA DEL NORTE PROVINCE