Magpahigayon og libreng Pediatric Surgery Check-Up ang Zamboanga del Norte Medical Center (ZNMC) alang sa mga kabataang nanginahanglan og surgical evaluation karong Sabado, Hulyo 4, 2026, sa Out-Patient Department (OPD) sa ospital.
Ang maong programa gipasiugdahan sa Kagamhanang Probinsiyal sa Zamboanga del Norte pinaagi sa One Stop Assistance Center (OSAC), sa pakigtambayayong sa ZNMC ug sa iyang Medical Team. Tumong niini ang paghatag og dekalidad nga serbisyong medikal sa mga kabataan nga nanginahanglan og operasyon o surgical assessment, ilabina sa mga pamilyang adunay limitadong kapasidad sa pinansyal.
Pagapangunahan ang libreng konsultasyon ni Dr. Noel Astrologo, usa ka espesyalista sa Pediatric Surgery. Magsugod ang check-up alas-8:00 sa buntag ug molungtad hangtod alas-12:00 sa udto sa ZNMC OPD.
Giawhag sa Provincial Government ug OSAC ang mga ginikanan nga adunay mga anak nga nanginahanglan og surgical evaluation nga pahimuslan ang maong libreng serbisyo. Alang sa dugang nga impormasyon, mahimo silang moduol sa OSAC Office sa Provincial Capitol o sa ZNMC Medical Team Office.(JENIFFER JR. DELICA)
Source: Zamboanga del Norte Provincial News Network