Gipahibalo sa Provincial Government of Zamboanga del Norte nga maglunsad kini og libreng medical check-up pinaagi sa “Kuyog Ta!” program karong bulan sa Pebrero, nga ipahigayon sa Zamboanga del Norte Medical Center (ZNMC) isip kabahin sa paningkamot sa probinsya ilalom sa liderato ni Gov. Darel Uy nga mapalapad ang access sa serbisyong panglawas sa katawhan.
Ipatuman ang program sa pakigtambayayong sa ZNMC Medical Team ug sa Office of the One Stop Assistance Center (OSAC), nga maglakip sa Pediatric Surgery sa Pebrero 4, 2026 uban ni Dr. Noel Astrologo, Adult Surgery Cases sa Pebrero 6, 2026 uban nila Dr. Imeldo Gamallo ug Dr. Jonathan Navarro, ug OB-Gyne cases sa Pebrero 7, 2026 uban ni Dr. Dino James Abong.
Pagasugdan ang tanang konsultasyon alas 8:00 sa buntag didto sa Outpatient Department sa ZNMC, Sicayab, Dipolog City, diin gidapit ang publiko nga mogamit sa serbisyong walay bayad isip dakong tabang sa pag-atiman sa kahimsog ug sa padayon nga tumong sa probinsya nga mahatagan og duol, accessible, ug makiangayon nga healthcare ang tanang Zanortehanon.(IKEN B. GULLEM)
Source: Zamboanga del Norte Medical Team