Ipahigayon karong Hunyo 4 ang libreng spay ug neuter program alang sa mga iro ug iring isip kabahin sa selebrasyon sa ika-74 nga Adlaw sa Zamboanga del Norte ug Saulog 2026.
Pagahimoon ang maong kalihokan sa Provincial Veterinarian Office sulod sa ZN Evacuation Center sa Barangay Turno, Dipolog City, diin makapahimulos ang mga rehistradong pet owners sa libreng serbisyo sa pagkapon sa ilang mga alagang hayop.
Sumala sa Provincial Veterinary Office, gikinahanglan ang una nga pagparehistro sa mga interesado aron mahatagan sila og hustong giya ug preparasyon alang sa luwas nga operasyon sa ilang mga iro ug iring.
Gilauman nga motambong ang dili moubos sa 18 ka beterinaryo gikan sa nagkalain-laing bahin sa Zamboanga Peninsula aron motabang sa maong programa, nga tumong sa pagpalambo sa responsableng pag-atiman sa mga binuhi ug pagkontrol sa populasyon sa mga hayop sa komunidad.(JENIFFER JR. DELICA)
Source: Zamboanga del Norte Provincial News Network