LILOY, ZAMBOANGA DEL NORTE — Nakadawat og libreng health ug wellness services ang mga bombero sa Liloy Fire Station niadtong Marso 31, 2026 isip kabahin sa selebrasyon sa Fire Prevention Month.
Gipangunahan ni Acting Municipal Fire Marshal FINSP Dave C. Dela Cruz, ang kalihokan uban sa suporta sa Manual Therapeutic Massage Clinic Liloy nga naghatag og libre nga massage, therapeutic services, ug bone setting sa mga personnel mismo sulod sa fire station.
Sumala sa estasyon, dako kaayo og tabang ang maong inisyatiba ilabi na nga busy ang mga bombero sa ilang mga operasyon ug responsibilidad sa komunidad, hinungdan nga nakahatag kini og higayon aron sila makapahulay ug makarekober.
Gipasalamatan sa Liloy Fire Station ang maong klinika sa ilang suporta, nga nakatabang sa pagpalig-on sa kahimsog ug kahimtang sa mga bombero aron magpadayon sa ilang serbisyo sa katawhan.(JENIFFER JR. DELICA)
Source: BFP R9 Liloy Fire Station