LILOY, ZAMBOANGA DEL NORTE — Naghimo og planning meeting ang Local Incident Management Team sa Liloy isip pagpangandam sa Via Crucis o Station of the Cross alang sa Semana Santa 2026.
Tumong sa maong tigum nga masiguro ang hapsay, organisado ug luwas nga pagpatuman sa relihiyosong kalihokan, ilabi na sa gilaumang pagdagsa sa mga deboto ug pilgrims sa lungsod.
Sumala sa LDRRMC Memorandum No. 004, s. 2026 ug ubos sa direktiba ni Mayor Roberto Lim Uy Jr., gi-activate ang Incident Management Team aron manguna sa koordinasyon sa mga operasyon sa wala pa, panahon, ug human sa kalihokan, uban sa partisipasyon sa PNP, BFP, RHU ug ubang partner agencies.
Gipasiugda sa LDRRMO Liloy nga pinaagi sa lig-on nga koordinasyon, crowd ug traffic management, ug andam nga medical ug emergency response, masiguro ang malinawon, luwas, ug makahuluganon nga pag-obserbar sa Semana Santa sa komunidad.(JENIFFER JR. DELICA)
Source: LDRRMO Liloy