GIPADAYON sa Provincial Government of Zamboanga del Norte (PGZN) ang paghatod sa libre nga dental nga serbisyo ngadto sa mga hilit ug layo nga barangay pinaagi sa Kuyog Ta, Medikal ug Serbisyo Caravan aron mas mapadali ang pag-angkon sa serbisyong panglawas sa katawhan.
Pinaagi sa maong inisyatiba, dili na kinahanglan nga mobiyahe pa ngadto sa siyudad ang mga residente alang sa dental check-up ug uban pang oral healthcare services, nga makatabang usab sa pagpakunhod sa ilang gasto sa transportasyon ug uban pang kinahanglanon.
Gibutyag sa PGZN nga ang programa kabahin sa padayon nga paningkamot sa probinsyal nga pangagamhanan sa pagduol sa serbisyong medikal ngadto sa mga komunidad nga adunay limitado nga akses sa panglawas nga pasilidad.
Gilauman nga pinaagi sa libre nga dental nga serbisyo, mas daghang residente sa mga kalayong lugar ang makabenepisyo sa hustong pag-atiman sa ilang kahimsog sa baba ug ngipon samtang nagtipig sa ilang kuwarta alang sa adlaw-adlaw nga panginahanglan sa pamilya.(JENIFFER JR. DELICA)
Source: Zamboanga del Norte Provincial News Network