Miabot sa tanang 17 ka barangay sa Pres. Manuel A. Roxas, Zamboanga del Norte ang libreng bugas ubos sa LGSF-FALGU 2026 Rice Distribution Project, diin matag kwalipikadong pamilya nakadawat og 10 ka kilo nga bugas aron makatabang sa ilang adlaw-adlaw nga panginahanglan.
Gipangunahan sa Local Government Unit ang distribusyon sa ayuda, ug niadtong Hunyo 12 pa lamang, nahatagan na daan ang mga benepisyaryo sa 14 ka barangay sa lungsod isip kabahin sa padayon nga paghatod sa serbisyo ngadto sa mga residente.
Gimonitor sa DILG Region 9 ug sa mga lokal nga opisyal ang tibuok proseso pinaagi sa dokumentasyon, pakighinabi sa mga benepisyaryo, ug pag-validate sa distribusyon aron masiguro nga hapsay, tukma ug transparent ang pagpatuman sa programa.
Mipadayag og dakong pasalamat ang mga nakadawat sa ayuda, ilabi na sa pagsaka sa presyo sa bugas. Matud sa mga benepisyaryo, dako kining kahupayan sa ilang bulsa tungod kay ang kuwarta nga para unta sa bugas mahimo nang magamit alang sa sud-an ug uban pang kinahanglanon sa panimalay.(JENIFFER JR. DELICA)
Source: DILG Region IX