Nagpadayag og dakong garbo ang Local Government Unit sa Roxas samtang andam na ang Team Philippines sa pag-apil sa Asia Pacific Cup Malaysia 2026 nga pagahimoon karong Marso 24 hangtod 29 sa Kuala Lumpur, Malaysia.
Kini nga internasyonal nga torneyo magtapok sa nagkalain-laing elite nga koponan gikan sa Asia-Pacific region, nga magpasundayag sa taas nga lebel sa kompetisyon sa basketball ug maghatag og higayon sa mga batan-ong atleta nga mapakita ang ilang talento sa mas lapad nga entablado.
Usa sa mga magdudula nga giila sa komunidad mao si Kyle Matthew Rengquijo, nga mokompetensya ubos sa PBYC 16-Under Category oa ang Passerelle Basketball Youth Championship, usa ka organisadong liga alang sa kabatan-onan nga nagtumong sa pagpalambo sa fundamental skills, disiplina, ug sportsmanship sa basketball pinaagi sa kompetisyon sa nagkalain-laing age-group categories.
Isip kabahin sa delegasyon sa Pilipinas, si Rengquijo giila nga usa sa mga nag-uswag nga batan-ong atleta nga adunay dako nga potensyal sa isport, ug ang iyang pag-apil nagdala og dungog sa iyang lungsod isip apo sa kasamtangang Municipal Mayor.
Samtang nagkaduol ang sugod sa torneyo, nagpadayon ang suporta sa komunidad alang sa Team Philippines, uban sa paglaum nga makab-ot nila ang kalampusan ug makadala og dungog sa nasud.(IKEN B. GULLEM)
Source: Roxas Zambonorte