Nagpalig-on sa ilang kooperasyon ang Philippine Coast Guard ug ang lokal nga kagamhanan sa Dipolog City alang sa mas episyenteng maritime safety ug emergency response sa baybayon sa lalawigan.
Niadtong milabay nga adlaw, mipahigayon og courtesy visit si CDR Romel B. Dua, PCG, bag-ong Commander sa Coast Guard Station Zamboanga del Norte, kauban si LTJG Allan Joel R. Timbal, PCG, Commander sa Coast Guard Substation Dipolog, sa City Mayor’s Office.
Gisugat sila ni Mayor Roberto Y. Uy aron hisgutan ang pagpalig-on sa koordinasyon sa pagresponde sa mga insidente sa kadagatan, lakip ang rescue operations ug proteksyon sa mga mangingisda ug pasahero.
Ang maong panagtigom naghatag og gibug-aton sa kahinungdanon sa mas paspas nga komunikasyon ug joint operations tali sa Coast Guard ug LGU aron mapalambo ang kaluwasan sa maritime nga kalihokan sa Zamboanga del Norte.
Pinaagi niini gilauman ang mas lig-on nga partnership, dali nga emergency response ug mas mapalig-on ang seguridad sa kadagatan sa tibuok lalawigan.(IKEN B. GULLEM)
Source: Dipolog City Government