Paspas nga gi-respondihan sa mga personahe sa Dapitan City Bureau of Fire Protection ang nahitabong Vehicular Accident, didto sa National Highway sa Barangay San Pedro sa Dakbayan sa Dapitan, niadtong nakalabay’ng adlaw Hulyo 27, 2025.
Base sa pahayag nga giluwatan sa BFP Dapitan, nga naka dawat og tawag ang ilang buhatan mahitungod sa usa ka insidente nga nahitabo sa nasangpit nga lugar, maong dali dayon kining gi-respondihan sa ilang mga personahe nga anaa sa Emergency Medical Response Shift A, ug sa ilang paghidangat sa nahisgutang lugar, ilang naabtan ang usa ka lalaking anaa na sa hingkod ang pangidaron, nga maoy biktima sa maong aksidente, diin gipahigayonan dayon nila kini og First Aid, pinaagi usab sa pagkuha sa iyang vital sign, ug sa dihang ila ng napiho nga anaa na sa luwas nga kahimtang ang nahisgutang biktima, gisakay dayon kini sa ambulance ug gihatod ngadto sa pinaka duol nga tambalanan, alang na sa medikal nga iyang panginahanglan.
Matud pa nga ang maong biktima anaa na sa luwas nga kahimtang og nagpaalim nalang sa mga bun-og ug pangus nga iyang naangkon tungod sa maong disgrasya, samtang padayon pang mipahigayon og imbistigasyon ang mga kapulisan sa Dapitan, aron masayran ang hinungdan sa maong aksidente.
Padayon nga pahimangno sa mga awtoridad ngadto sa mga Motorista, nga kanunay’ng mag-amping sa inyong mga pagmaneho, ug likayan nga mo-inum og Ilimnong makahubog kon magmaneho aron mahilikay sa posebling disgrasya.(Julius Esmade)
Source: BFP Dapitan