Gidali og respondehan sa Shift A Emergency Medical Services sa Liloy Municipal Fire Station ang duha ka pasyente human maaksidente sa Barangay Patawag, Liloy, Zamboanga del Norte niadtong Hulyo 19, 2026.
Pag-abot sa mga responder, ilang naabtan ang unang pasyente nga adunay panimuot ug makatubag, samtang ang ikaduhang pasyente naghigda sa daplin sa dalan ug lisod na makatubag. Sumala sa assessment sa EMS personnel, parehong adunay baho sa alkohol ang ilang gininhawa. Nakitaan ang unang pasyente og samad sa ulo, samtang ang ikaduha adunay samad sa ngabil ug kilid sa ilong.
Gihatagan dayon og unang tabang ang duha ka pasyente pinaagi sa paglimpyo ug pagtabon sa ilang mga samad aron malikayan ang impeksyon. Gisiguro usab sa responders ang ilang kahimtang samtang giandam alang sa pagbiyahe ngadto sa ospital.
Gidala ang duha ka pasyente pinaagi sa BFP ambulance ngadto sa Liloy Integrated Health District Hospital alang sa dugang nga medikal nga pagsusi ug pagtambal, diin husto silang gitunol ngadto sa mga medical staff uban sa impormasyon sa ilang kahimtang ug nahatag nga unang pag-atiman.(JENIFFER JR. DELICA)
Source: BFP R9 Liloy Fire Station