Dakpan sa kapulisan ang usa ka lalaki kinsa gikataho nga nalambigit sa pagpamaligya sa mga smuggled nga sigarilyo didto sa Brgy. Bantayan, Sindangan Zamboanga del Norte, sa may alas 3:30 ang takna sa kahapunon, Nobyembre 26,2024.
Naila ang dinakpan nga usa ka lalaki, ulitawo, walay trabaho, Filipino ug residente sa Brgy. Bantayan, Sindangan Zamboanga del Norte kinsa gidakop sa mga personahe sa Sindangan MPS nga nagpahigayon og ronda sa Barangay Bantayan, Sindangan partikular na sa likod nga bahin sa Manna Hardware ug napakyas sa pagpresentar sa mga dokumento.
Atol sa operasyon nasakmit ang 8 ka ream sa YS brand nga sigarilyo nga kolor pula ug itom nga kombinasyon, 6 ka ream sa YS brand nga sigarilyo nga kolor puti, 3 ka ream sa President brand sigarilyo kolor pula, ug 1 ka pirasong sako nga kolor puti nagsilbing sudlanan sa sigarilyo.
Ang mga nakumpiska nga dili dokumentado nga mga smuggled nga sigarilyo muabot sa kinatibuk-an nga 17 ka ream nga gibanabanang mobalor sa P19,482 ka pesos base sa BOC standard price niini.
Samtang ang dinakpan uban sa mga nakumpiska nga walay dokumento ug gidudahang smuggled nga sigarilyo gidala sa kustodiya sa Sindangan MPS. (Medalyn U. Borja)
(Source: ZNPPO)