Laing duha ka mga suspetsado sa pag kidnap sa American National nga si Elliot Eastman ang gikasohan na karon ug serious illegal detention ug kidnapping.
Matud pa sa PRO-9 kini ang bag-ong kalamboan sa kaso sa kidnapping incident nga nahitabo didto sa lungsod sa Sibuco, ZN kaniadtong nakalabay’ng buwan.
Ang duha ka mga suspetsado matud pa sa mga saksi nga adunay direktang partisipasyon sa pagdagit sa langyaw.
Kahibaloan nga sa miaging adlaw aduna pay laing tulo ka mga suspek ang unang nadakpan sa operasyon sa mga otoridad.
Sa pagkakaron aduna nay sulod sa 16 ka adlaw gikan sa pagdagit nga hangtud karon wala pa mahibaw-i kung asa gidala nga lugar o buhi pa ba ang maong nahisgutang langyaw.
Nanawagan usab ang mga otoridad sa publiko nga sa kanunay mo kigkoordinar kanila kung ugaling aduna silay nahibaw an ang lokasyon sa biktima aron luwas kini nilang makuha.
Ang kagamhanang America gapadala kini sa mga sakop sa Federal Bureau of Investigation aron motabang sa pagpangita sa gidagit nga Amerkano.
Ning pagbalita wala pa hibaw-i kung unsa nga grupo ang responsable sa pagkidnap kang Eastman.
Kahinumduman nga si Eastman miabot sa lungsod sa Sibuco kaniadtong bulan sa Mayo ug nagpakasal kini sa iyang hinigugma nga lumad nga nagpuyo didto sa nasangpit nga lungsod. (Angelica T. Obina)
(Source: ZNPPO)