Mokabat ngadto sa kinatibuk-ang kapin sa kinse (15) milyones ka pesos nga balor sa mga proyektong inprastraktura ang gi-turn-over ngadto sa mga kabaranggayan ning siyudad, Enero 5, 2024 sa kagamhanang lokal pinaagi sa City Engineering Office.
Ang nasangpit nga mga proyekto gilangkoban sa mga Road Concreting ug pagtukod sa pipila ka mga pasilidad nga tuyong gihimo alang sa katawhang Dipolognon.
Nanguna sa maong kalihokan mao si City Mayor Darel Dexter T. Uy, kauban nila ni City Engineer, Engr. Susan B. Ualat, uban sa mga personahe sa nahisgotang buhatan sa unahan.
Sa maong turn-over, mainiton usab kining gitambongan sa mga opisyales sa mga hingtungdang barangay, pinaagi sa pagpanguna usab sa mga Punong Barangay, niini.
Sigun sa dugang nasayran, nga kining nasangpit nga mga proyekto tuyong gimugna, aron sa paghatag sa dugang kalamboan sa mga kabaranggayan dinhi palibot sa siyudad, nga gilantaw nga makatabang og dako sa mga katawhan.
Sumala pa, nga sukad sa paglingkod ni City Mayor Darel Dexter T. Uy isip Mayor ning atong dakbayan, wala’y hunong ang pagbubo sa mga nagkalain-laing proyekto dinha sa atong mga kabaranggayan, hangtud na ning kasamtangan.
(Source: DIPOLOG CITY GOVERNMENT Facebook Page)
