Nagpagawas og Thunderstorm Advisory No. 23 ang Philippine Atmospheric, Geophysical and Astronomical Services Administration (PAGASA) nga nagpasidaan sa posible nga moderate hangtod kusog nga ulan, uban ang kilat ug kusog nga hangin, nga gilauman karon, Enero 5, 2026.
Ang maong kahimtangan sa panahon mahimong molungtad og 1 hangtod 2 ka oras matag higayon nga mosugod ang thunderstorm activity.
Apil sa mga lugar nga posibleng maapektuhan ang Dipolog City, Dapitan City, Katipunan, Sibutad, La Libertad, Piñan, Polanco, Mutia, Sergio Osmeña Sr., Manukan, Jose Dalman, President Manuel A. Roxas, Rizal, Siayan, Sindangan, Tampilisan, Liloy, Salug, Leon B. Postigo, Godod, Labason ug Kalawit.
Matod pa sa PAGASA, ang kusog nga ulan mahimong hinungdan sa flash floods ug landslides, ilabi na sa mga ubos nga lugar ug kabukiran. Gidasig ang katawhan nga mag-amping, likayan ang pagtabok sa baha, ug mag-andam sa kalit nga pagtaas sa tubig.
Gihangyo usab ang publiko nga padayon nga magbantay sa pinakabag-ong weather updates gikan sa PAGASA sa lokal nga disaster risk reduction and management offices.(IKEN B. GULLEM)
Source: PAGASA-Mindanao PRSD