Mas mapalig-on pa ang pagpatuman sa mga programa ug serbisyo alang sa kababayen-an ug kabataan pinaagi sa 2026 Second Quarter Joint Meeting sa Local Council for the Protection of Children (LCPC) ug Local Council Against Trafficking and Violence Against Women (LCAT-VAW) nga gipahigayon niadtong Hunyo 15 sa City Hall.
Gisentro sa tigom ang pagrepaso sa kahimtang sa mga kaso sa Violence Against Women and Children (VAWC), paghatag og updates sa mga konseho ug organisasyon nga nag-alagad sa kababayen-an, ug paghisgot sa mga lakang aron mas mapalambo ang proteksyon ug suporta sa mga biktima sa kapintasan ug pagpahimulos.
Lakip sa mga gihisgutan ang First Quarter Report sa VAWC victim-survivors, Women’s Center Statistical Report, reorganisasyon sa Local Council of Women (LCW) ug Kalipunan ng Liping Pilipina (KALIPI), ingon man ang resulta sa Republic Act No. 11930 Training Seminar.
Pinaagi sa padayon nga panaghiusa sa mga stakeholder, gitinguha sa konseho nga masiguro ang mas organisado ug epektibong paghatag sa mga programa nga nagpanalipod sa katungod, kaluwasan, ug kinatibuk-ang kaayohan sa kababayen-an ug kabataan sa komunidad.(IKEN B. GULLEM)
Source: Dipolog City Government