Gisuspenso sa lokal nga pangagamhanan sa Katipunan, Zamboanga del Norte ang klase gikan nursery hangtud kolehiyo ug ang trabaho sa tanang government offices, gawas sa MDRRMO, trained responders, MSWDO, MHO, PNP ug BFP alang sa Nobyembre 10, 2025, human sa usa ka emergency meeting nga gipangulohan ni Mayor Maiko Wong ug Acting Mayor Antonio Jumawak uban sa MDRRMO Designate Filomena J. Valencia.
Ang tanan nga klase ipatuman pinaagi sa distance learning sulod sa tibuok adlaw. Ang private establishments gipasagdan sa ilang tagsa-tagsa ka desisyon, apan kusog nga gi-awhag sa LGU ang pag-suspenso alang sa kaluwasan sa mga empleyado.
Gi-orden usab nga i-activate ang BDRRMC sa tanang barangay ilabi na sa coastal areas sama sa Tuburan, New Tambo, Uno, Dos, Dr. Rizal, ug San Antonio, ug ipaepekto ang evacuation sa mga lumolupyo nga duol sa baybay tungod sa posible nga storm surge. Ang mga residente sa kabukiran nga daplin sa pangpang ug suba gipasulod usab sa designated evacuation centers.
Ang LGU mibutyag nga kini nga lakang usa ka pre-emptive measure aron mapanalipdan ang katawhan batok sa hulga sa Super Typhoon Uwan. Gihangyo usab ang publiko nga mosunod sa advisories sa PAG-ASA ug MDRRMO ug magpabiling andam ug mabinantayon.(IKEN B. GULLEM)
Source: Bag-ong Katipunan