Gipasuspenso ang tanang klase sa tanang lebel sa lungsod sa La Libertad, Zamboanga del Norte karong Agosto 24, 2026 tungod sa extreme heat condition. Gihimo ang maong lakang alang sa kahimsog, kaluwasan, ug kaayohan sa mga estudyante, magtutudlo, ug school personnel.
Gidasig ang mga ginikanan ug guardians nga ipabilin sa balay ang mga bata, ilabina sa bugnaw ug maayong bentilasyon nga lugar, ug sigurohong igo ang ilang pag-inom og tubig. Gipasidan-an usab sila nga likayan sa mga bata ang dili kinahanglan nga pag-adto sa gawas ug dugay nga pagkaladlad sa direktang silaw sa adlaw.
Gipahinumdoman usab ang mga ginikanan ug guardians nga bantayan pag-ayo ang mga bata alang sa posibleng mga timailhan sa sakit nga may kalabotan sa grabeng kainit ug sigurohong adunay hustong pagdumala sa hamtong sa tibuok adlaw.
Gipasiugda nga ang kaluwasan ug kaayohan sa mga bata mao ang pangunang prayoridad samtang nagpadayon ang grabeng kainit sa maong lugar.(JENIFFER JR. DELICA)
Source: Municipality of LA Libertad