DAPITAN CITY — Andam na nga modasok ang aksyon sa umaabot nga Kinabayo Festival 2026 1st Basketball Open Tournament diin unom ka lig-ong koponan ang magbanggaay alang sa kadaugan ug bahin sa ₱350,000 nga total prize pool.
Kabahin sa kasaulogan sa Kinabayo Festival, gilauman nga mahimong sentro sa kalingawan ug kompetisyon ang torneyo samtang ipakita sa mga manlalaro ang ilang talento, disiplina ug sportsmanship sulod sa hardcourt.
Naglakip sa mga koponang moapil ang Rosal Poultry Farm, Dakak by the Mercados, ARNO CDO, LBJ Dipolog, IAN R, ug CZAD x JHIM FARM, nga andam makigbisog alang sa kampeonato ug dagkong premyo.
Makadawat og ₱200,000 ang kampyon, ₱100,000 ang ikaduhang puwesto, ug ₱50,000 ang ikatulong puwesto. Gilauman usab nga ang torneyo makapadugang sa kahinam sa pista ug makapalig-on sa panaghiusa sa mga basketball fans ug komunidad sa Dapitan.
Pinaagi niini nga kalihokan, padayon nga gipakita sa Dakbayan sa Dapitan ang suporta sa sports development ug sa paghatag og higayon sa mga atleta nga mapakita ang ilang kahusayan atol sa usa sa labing dako nga kasaulogan sa siyudad.(JENIFFER JR. DELICA)
Source: Dapitan City Government