Tungod sa hulga sa kusog nga storm surge nga dala ni Super Typhoon “Uwan,” gipasiugdahan sa lungsod sa Katipunan, Zamboanga del Norte ang preemptive evacuation aron malikayan ang kadaot ug masiguro ang kaluwasan sa mga lumulupyo nga nagpuyo sa mga peligroso nga dapit. Gidasig sa mga opisyal ang tanan nga lumulupyo sa baybayon nga mobalhin sa mas luwas nga lugar.
Samtang sa lungsod sa Salug, gisugdan na usab ang forced evacuation sa walo ka coastal barangays, diin gihatagan prayoridad ang kaluwasan sa kapin duha ka libo ka katawhan nga posibleng maapektuhan sa pagsaka sa lebel sa dagat. Padayon ang pagbantay sa mga lokal nga opisyal aron matubag dayon ang panginahanglan sa mga evacuees.
Nagpabilin sa high alert ang mga lokal nga panggamhanan samtang nagpadayon ang bagyo, ug gideploy ang mga rescue team sa mga apektadong lugar. Gipasidaan usab ang tanan nga magpabilin lamang sulod sa ilang mga panimalay ug sundon ang pahimangno sa mga awtoridad.(JENIFFER JR. DELICA)
Source: Zamboanga del Norte Provincial News Network, MDRRMO-Katipunan and MDRRMO-Salug