Subli karong nanawagan ang Sanitation Division sa City Health Office ning siyudad ngadto sa tanang katawhan alang sa pagsanong sa padayong gipatuman nga Ordinansa No. 123 dinhi palibot sa atong siyudad.
Kining maong panawagan ang gihimo gumikan kay matud pa, nga sa kadugayon na nga kining nasangpit nga ordinansa gipatuman dinhi sa atong siyudad, aduna pa man gihapo’y mga paglapas nga nahimo sa atong pipila ka kaigsoonan.
Dugang pa nga unta taud-taod na man kining gipatuman dinhi sa atong dapit ug nasayod naman tingali ang tanan, busa ato na sigurong na-andan kining maong simpleng buluhaton.
Sigun sa makita sa accomplishment report gikan sa nahisgotang buhatan sa unahan nga kadaghanan sa mga nakalapas ang nagpangidaron gikan 40 anyos pataas, ug ang kalagmitan sa paglapas ang gilangkoban sa
- paglabay sa mga sagbot sa dili basurahan,
- pagpangihi sa dili dapit ihi-anan,
- hugaw nga comfort rooms
- pagpangluwa sa bisan asang pampublikong dapit, nga kasagaran usab nahimo sa daghang tawo, sama sa merkado publiko, terminal ug uban pa.
Subay ning maong obserbasyon, hugtanon na usab karong naga-awhag ang buhatan sa City Health ning siyudad ngadto sa tanan, sa pagsuporta pagsanong usab sa Ordinansa no. 196 o nailang Anti-Smoking Ordinance, sanglit nga kining maong mga ordinansa ang tuyong gipanday alang sa kaayohan sa kinabag-ang katawhan.
(Source: Dipolog City Government Facebook page)