Kapin ₱4.1 milyon nga kantidad sa undocumented cigarettes ang nasakmit sa kapulisan atol sa checkpoint operation sa Barangay Canawan, Salug, Zamboanga del Norte niadtong milabay nga adlaw.
Gikumpiska sa mga personnel sa Salug Municipal Police Station (MPS) ang kinatibuk-ang 1,049 ka reams sa sigarilyo nga naglangkob sa 525 reams sa Berlin cigarettes ug 524 reams sa Champion cigarettes.
Gibanabana sa Bureau of Customs Standard Price nga mokabat sa ₱4,133,060.00 ang kinatibuk-ang kantidad sa mga nakumpiskang sigarilyo.
Nasakmit ang mga sigarilyo sulod sa usa ka Nissan Livina nga gipara sa mga pulis alang sa routine verification ug inspection atol sa random checkpoint sa Purok Kalauman, Barangay Canawan, alas-9:30 sa gabii.
Ang drayber sa sakyanan, usa ka 47-anyos nga lalaki nga residente sa Zamboanga City, gidakop tungod sa giingong paglapas sa Republic Act No. 10643, o Graphic Health Warnings Law.
Ang mga nakumpiskang sigarilyo ug ang sakyanan anaa na sa kustodiya sa Salug MPS alang sa hustong disposisyon ug dugang nga legal nga proseso, sa koordinasyon sa mga hingtungdan nga ahensya.
Gipasigarbo sa Police Regional Office 9 nga magpadayon ang ilang kampanya batok sa smuggling, illegal trade, ug pagbiyahe sa undocumented nga mga produkto aron mapugngan ang pag-apod-apod niini sa rehiyon.(IKEN B. GULLEM)
Source: PNP Police Regional Office 9