Mokabat sa 8,992 ka panimalay sa 14 ka barangay sa lungsod sa Sindangan ang nakabenepisyo sa Rice Distribution Program nga gipahigayon sa Local Government Unit (LGU) sa Sindangan.
Gipangulohan ni Mayor Glona G. Labadlabad ang programa uban sa mga personnel sa Municipal Social Welfare and Development Office (MSWDO) ug Municipal Agriculture Office, isip kabahin sa mga lakang sa lokal nga pangagamhanan sa paghatag og tabang sa mga pamilyang nanginahanglan.
Lakip sa mga barangay nga sakop sa programa ang Dagohoy, Tinaplan, Datagan, Inuman, Maras, Upper Inuman, Mandih, Datu Tangkilisan, Goleo, Piao, Balok, Lagag, Dicoyong, ug Labakid.
Ang Mandih maoy adunay pinakadaghang benepisyaryong panimalay nga mokabat sa 1,222, gisundan sa Goleo nga adunay 880, Piao nga 847, Datu Tangkilisan nga 766, ug Maras nga 729.
Sa laing bahin, ang Dagohoy adunay 244 ka panimalay nga nakadawat, samtang 416 sa Tinaplan, 282 sa Datagan, 590 sa Inuman, 711 sa Upper Inuman, 538 sa Balok, 606 sa Lagag, 603 sa Dicoyong, ug 558 sa Labakid.
Gitumong sa programa nga mahatagan og dugang suporta ang mga pamilya pinaagi sa paghatag og bugas, ilabina sa mga komunidad nga nanginahanglan og tabang alang sa ilang inadlaw-adlaw nga panginahanglan.
Gipahayag usab sa LGU Sindangan nga ang programa kabahin sa ilang padayong paningkamot sa paghatod sa mga serbisyo ug ayuda mas duol sa mga residente ug pagpalig-on sa suporta alang sa mga pamilya sa lungsod.(IKEN B. GULLEM)
Source: Municipality of Sindangan