Kapin sa 300 ka mag-uuma ug mananagat gikan sa Roxas, Manukan ug Katipunan ang nakadawat og binhi, kagamitan sa uma ug panagat, ug lain pang suplay sa gipahigayon nga joint distribution sa DA-PhilRice, PLGU ug MLGU didto sa Evacuation Center sa Barangay Mias, Katipunan.
Ang kalihukan gitambongan nila Governor Darel Dexter Uy, Mayor Jose Michael Meiko Wong, Board Member Jojo Documento, ug mga representante gikan sa lain-laing ahensya sa Department of Agriculture. Gihatag ang inbred ug hybrid seeds, thresher units, mudboats, hook and lines, farm inputs, ug motorized engines nga makatabang sa produksiyon sa palay ug panagat sa tulo ka munisipyo.
Gipasalamatan ni Gov. Uy ang mga partner agencies ug gibutyag ang padayon nga programa sama sa organic fertilizer initiative ug ang paglusad sa Rice for All Program karong Nobyembre 28 aron makapalit ang matag panimalay og P20 nga bugas. Gipasiugda niya nga pinaagi sa panaghiusa sa PLGU, MLGU ug mga ahensya, mas paspas matabangan ang mga mag-uuma ug mananagat sa probinsiya.(JENIFFER JR. DELICA)
Source/Photo Courtesy: Zamboanga del Norte Provincial News Network