Nagpahimangno ang Dakbayan sa Dipolog pinaagi sa Traffic Management Office (TMO) nga mas hugtanong ipatuman ang truck ban ubos sa Traffic Code of Dipolog ilawom sa Ordinance No. 107 Section 23 aron masiguro ang hapsay nga trapiko ug kaluwasan sa mga motorista sa sentro sa siyudad.
Ubos sa maong regulasyon, dili tugotan ang tanang dagkong sakyanan nga molapas sa lima ka tonelada nga mosulod, moparada, o mag-standby sa sentro gikan Lunes hangtod Sabado, alas 6:00 hangtod alas 9:00 sa buntag ug alas 4:00 hangtod alas 7:00 sa gabii. Apektado niini ang mga dalan sama sa Rizal Avenue, Quezon Avenue, General Luna, Echavez, Lacaya, Bonifacio, Osmeña, ug Burgos.
Gipahibalo sa TMO nga magbutang sila og klarong mga sinyales aron masayran sa mga drivers ang oras nga bawal ang trapiko alang sa dagkong sakyanan. Nangayo usab og kooperasyon ang lokal nga kagamhanan aron malikayan ang silot ug aron matabangan ang pag-hupay sa trapiko sa tibuok siyudad.(JENIFFER JR. DELICA)
Source/Photo Courtesy: Dipolog City Government