Gipahugot ang seguridad sa mga eskwelahan human sa bag-uhay nga report bahin sa usa ka online threat batok sa usa ka lokal nga eskwelahan. Ang maong hulga mahimong makahatag og kahadlok sa mga estudyante, kabalaka sa mga ginikanan, ug kawalay kasigurohan sa mga magtutudlo.
Girespondehan dayon kini sa Philippine National Police o PNP, samtang nakigtambayayong ang Department of Education o DepEd ug City Government of Dipolog sa pagpalig-on sa seguridad sa mga eskwelahan. Gipakita sa maong mga lakang ang ilang pagtagad sa kaluwasan sa mga estudyante ug magtutudlo.
Gipahinumdoman ang mga ginikanan nga magbantay sa online nga kalihokan sa ilang mga anak, samtang gidasig ang mga magtutudlo ug school officials nga hatagan og higayon ang mga estudyante nga makareport sa ilang mga kabalaka. Gidasig usab ang mga estudyante nga mosulti kung makamatikod og kadudahang pamatasan.
Gipahimangnoan ang publiko nga dili magpakaylap og wala pa mapamatud-ang impormasyon aron malikayan ang dugang nga kahadlok ug kalibog. Gipasiugda nga ang kaluwasan sa mga estudyante ug magtutudlo nagkinahanglan og padayon nga pagbantay, hustong pagreport, ug kooperasyon sa komunidad.(JENIFFER JR. DELICA)
Source: Zamboanga del Norte Provincial News Network