Pormal nga nanumpa si Constantino “Boboy” Soriano Jr. isip Sangguniang Bayan Member sa lungsod sa Siocon, atubangan mismo ni Governor Rosalina “Nanay Nene” Jalosjos ug Mayor Ceasar C. Soriano sa Provincial Guest House, Turno Dipolog City, Hunyo 1.
Si kanhi Zamboanga del Norte 3rd District Board Member Boboy Soriano, mihulip sa iyang asawa nga si Siocon Konsehal Maria Azucena “Zeng” Bernaldes Soriano nga mitaliwan na sa laing kalibutan kaniadtong Abril 15 ning tuiga.
Niini, nagpasalamat ang bag-ong Konsehal sa Siocon ngadto ni Governor Nanay Nene Jalosjos nga maoy inducting officer nga human sa maong pagpanumpa pormal na kining molingkod sa iyang katungdanan isip konsehal sa lungsod.
Samtang si Mayor Soriano mipasabot nga base sa kamandoan nga ang mga membro sa partido moduso sa kandidato isip hulip sa nawala, apan ang pormal nga mo-nominate mao ang chairman mismo sa partido.
Dugang ni Mayor Soriano nga mismo si kanhi Senator Manny Villar nga Chairman sa Nacionalista Party mipirma sa nomination letter ug appointed usab ni Governor Jalosjos, si kanhi Board Member Boboy isip usa sa SB Member sa Siocon hulip sa bakante nga posisyon tungod sa pagtaliwan sa kapikas niini.
Nagkanayon usab ang batan-ong mayor nga desisyon sa pamilyang Soriano nga ang mga tahas ug tinguha sa mipanaw nga konsehal alang sa katawhan sa naasoy nga lungsod, ang ipadayon kini ni Konsehal Boboy Soriano.
(Source: Provincial Information Center ZaNorte Facebook page)
