Gisaulog sa Dapitan City Police Station (CPS), sa pakigtambayayong sa Philippine Drug Enforcement Agency (PDEA) ug Municipal Anti-Drug Abuse Council (MADAC), ang International Day Against Drug Abuse and Illicit Trafficking pinaagi sa pagpahigayon og information and education campaign niadtong Hunyo 26 sa Barangay Guimputlan, Dakbayan sa Dapitan.
Gipangunahan ang kalihokan ni PCMS Marwin L. Cimafranca uban ni Engr. Nonito Malacat, MADAC Focal Person, diin mitambong ang mga residente gikan sa Cluster 1 nga naglangkob sa Barangay Napo, Baylimango ug Carang.
Atol sa programa, gipahinumdoman ni PSSg Manuel A. Projo III ang mga partisipante bahin sa Katarungang Pambarangay, mga pamaagi sa pagpugong sa kriminalidad, ug hustong pagdumala sa mga kaso sa barangay. Gihatagan usab og kahibalo ni PSSg Kesheena Moreen Ibno ang mga residente kabahin sa Anti-Violence Against Women and Their Children Act, Anti-Bullying Act, ug Safe Spaces Act.
Matud sa Dapitan CPS, ang kalihokan kabahin sa padayon nga kampanya aron mapalig-on ang kahibalo sa publiko batok sa ilegal nga droga, mapugngan ang kriminalidad, ug mapanalipdan ang kababayen-an, kabataan ug komunidad pinaagi sa hiniusang paningkamot sa mga ahensya sa gobyerno ug sa katawhan.(IKEN B. GULLEM)
Source: PNP Dapitan City Police Station