Gibutyag ni Dipolog City Mayor Roberto “Berto” Uy ang daghang kalamposan ug padayong kalamboan sa siyudad atol sa iyang State of the City Address (SOCA) niadtong Hunyo 16, sa Zamboanga del Norte Convention and Sports Center diin iyang gipadayag ang mga proyekto ug programa nga nakahatag og kaayohan sa mga Dipolognon sa natad sa agrikultura, imprastraktura, panglawas, turismo, ug kalinaw sa komunidad.
Usa sa mga gibutyag nga kalampusan sa mayor mao ang pagpalig-on niini sa sektor sa agrikultura pinaagi sa EGBU Program, diin 16 ka ektarya sa yuta ang napahimuslan alang sa pagpananom sa mga barangay Gulayon, Dicayas, Galas, Cogon, San Jose ug Diwan. Gisuportahan usab ang mga mag-uuma pinaagi sa paghatag og farming vehicles ug tabang nga mikabat sa P7.53 milyon alang sa mga mag-uuma ug mangingisda.
Sa pagpakunhod sa gasto sa pagkaon sa mga pamilya, gipadayon sa administrasyon ang P20 Rice for All Program, diin kapin 7,000 ka sako o 350,000 ka kilo sa bugas ang naibaligya sa mga benepisyaryo. Dugang pa, kapin 30,000 ka panimalay ang nakadawat og bugas ubos sa Food Assistance through Rice Distribution Project nga nagkantidad og P21 milyon.
Sa bahin sa imprastraktura, gipahibalo ni Mayor Uy nga kapin P70 milyon ang gigahin alang sa pagtukod sa mga school buildings, covered courts ug uban pang pasilidad. Gipadayon usab ang pagtukod sa P450-milyon nga bag-ong Dipolog City Public Market, nga gilauman mahimong moderno ug mas organisadong sentro sa komersiyo.
Lakip usab sa dagkong proyekto nga gipadayag atol sa iyang SOCA ang pagtukod sa usa ka state-of-the-art slaughterhouse, bag-ong Sangguniang Panlungsod Building nga nagkantidad og P145 milyon, ug ang pagpaayo ug pag-modernisa sa city cemetery aron mas maayong makaserbisyo sa publiko.
Sa natad sa turismo ug ekonomiya, giila sa mayor ang malampusong P’gsalabuk Festival, nga nakatampo sa pagtaas sa kita sa lokal nga ekonomiya. Samtang ang unang Dipolog Marathon, nga gitambongan sa kapin 3,300 ka partisipante, nakahatag og gibanabang P10.40 milyon nga economic impact sa siyudad.
Gipasiugda usab ang padayon nga pagpaayo sa Dipolog Boulevard, lakip ang gisugyot nga pagtukod sa boulevard amphitheater, Tourism Infrastructure and Enterprise Zone Authority (TIEZA) Tourism Economic Building, ug boardwalk aron mas mapalambo pa ang turismo.
Gipahinumdoman usab ni Mayor Uy ang padayon nga pagpalig-on sa peace and order pinaagi sa suod nga pakigtinabangay sa kapulisan ug ubang law enforcement agencies aron mapadayon ang kalinaw ug kaluwasan sa siyudad.
Sa katapusan, gipasalig ni Mayor Uy nga ipadayon sa iyang administrasyon ang mga programa ug proyekto nga nagpunting sa kalamboan sa ekonomiya, kaayohan sa katawhan, ug dugang pang pag-uswag sa Dipolog City isip usa sa labing nag-uswag nga siyudad sa Zamboanga Peninsula.(IKEN B. GULLEM)