Gipahigayon sa Department of Agriculture Region 9 (DA9) Livestock Program ang 3rd Quarter Livestock Outreach niadtong Agosto 18, 2026, aron mapalambo ang kahimsog sa mga kahayupan ug matabangan ang mga livestock raisers sa maong lugar.
Sa pakigtambayayong sa Provincial Veterinarian Office sa Zamboanga del Norte ug Municipal Agriculture Office sa Sergio Osmeña, giserbisyohan ang lain-laing kahayupan sama sa baka, kalabaw, kanding, iro ug iring.
Lakip sa mga serbisyo ang deworming, vitamin injection, Artificial Insemination (AI), ug health check-up alang sa mga hayop. Tumong niini nga mapugngan ang mga sakit ug mapadayon ang maayong kondisyon sa kahayupan.
Gihatagan usab og mga information materials ang mga tig-alima sa kahayupan mahitungod sa produksyon sa baka, kanding ug manok, lakip ang husto nga pagdumala ug pag-atiman sa mga hayop.
Pinaagi sa maong programa, gipadayon sa DA9 Livestock Program ang paghatag og suporta ug serbisyo sa mga mag-uuma aron makatabang osa pagpalambo sa livestock sector sa rehiyon.(IKEN B. GULLEM)
Source: Department of Agriculture Zampen