Malampusong napahigayon ang Provincial Level Hack4Gov Competition sa Zamboanga del Norte Convention and Exhibition Center, nga gipasiugdahan sa Department of Information and Communications Technology – Zamboanga del Norte Provincial Field Office (DICT-ZDN PFO), uban ang suporta sa Provincial Government sa Zamboanga del Norte (PGZN) niadtong Hulyo 29, 2025.
Ang maong competition gisalmotan kini sa mga estudyante gikan sa nagkadaiyang kolehiyo ug unibersidad sa lalawigan, nga nagpakita sa ilang kahanas ug kahibalo sa ethical hacking ug digital security. Sulod sa tulo ka oras, ilang gisulbad ang teknikal nga mga hagit gamit ang Capture-the-Flag (CTF) format, nga nagtutok sa cryptography, web vulnerabilities, steganography, ug programming exploits.
Ang Hack4Gov usa ka teknikal nga kompetisyon nga nagtumong sa pagpataas sa awareness sa cybersecurity ug ethical hacking sa kabatan-onan. Kini usa ka plataporma sa DICT aron andamon ang mga estudyante sa mga hagit sa digital age ug pagpili og labing maayong team nga magrepresentar sa Zamboanga del Norte sa umaabot na regional competition sa Zamboanga City.
Mapasalamaton ang DICT-ZDN Provincial Officer Aileen G. Padao sa walay puas nga suporta ni Gobernador Darel Dexter Uy, ilabina sa iyang paningkamot nga mapalambo ang digital empowerment ug teknikal nga edukasyon sa probinsya.
Sa mensahe ni Gov. Uy nga gipaabot sa iyang representante nga si Provincial Information Officer Rosemarie P. Miranda, iyang gipasalamatan ang DICT sa pagpahigayon sa kompetisyon. Gilauman usab niya nga kini nga kalihokan mahimong inspirasyon sa kabatan-onan aron mas masayud ug mainteresado sa mga larang nga may kalabotan sa information technology ug cybersecurity.
Tungod sa panaghiusa sa DICT ug PGZN, ang Hack4Gov Competition nahimong kalampusan ug nakahatag ug dakong oportunidad alang sa mga batang ZamboangueƱo sa natad sa teknolohiya.(Jumalisa Papa)
Source: ZNPNN