Gipakita sa kagamhanang lokal sa Dipolog ang lig-on nga panaghiusa ug kahandam human mipahigayon og Pre-Disaster Risk Assessment (PEDRA) kagahapong adlawa sa 2nd floor sa Museo Dipolog, isip bahin sa komprehensibong pagpangandam batok sa gipaabot nga epekto sa Bagyong Basyang.
Gipangulohan ang kalihokan sa City Disaster Risk Reduction and Management Office (CDRRMO) ubos sa pagpanguna ni OIC-CDRRMO Officer Felipe T. Mangila, nga nagtumong sa pagpalig-on sa koordinasyon tali sa mga ahensiya ug kabaranggayan sa dili pa ang posibleng pag-abot sa bagyo sugod karong Pebrero 6.
Gikatambongan ang tigum sa mga opisyales sa kabaranggayan, mga departamento sa kagamhanang lokal, ug mga law enforcement ug emergency response agencies sama sa Philippine National Police, Philippine Coast Guard, ug Bureau of Fire Protection. Mitambong usab si City Administrator Atty. Valerie Hope Jauculan-Flores nga nagrepresentar kang Mayor Roberto Y. Uy.
Usa sa gipunting nga anggulo sa tigum mao ang kahandam sa komunidad ug tukmang paghatag og responsibilidad sa matag ahensiya. Gisiguro sa City Social Welfare and Development (CSWD) nga andam na ang mga relief goods lakip ang pagkaon ug limpyo nga tubig nga ipanghatag dayon sa mga pamilyang mahimong maapektuhan.
Sumala sa CDRRMO, i-activate sugod ugma ang Incident Management Team nga ipahimutang sa Dipolog Listo Center. Andam usab ang buhatan sa pagkuha og dugang manpower gikan sa mga reservists kon magkinahanglanon sa rescue ug relief operations.(IKEN B. GULLEM)
Source: Dipolog City Government