Dipolog: Kagamhanang lokal ning siyudad mimando sa dinali-ang pag-ayo sa nagubang hanging bridge sa Barangay Lugdungan

0
14

Subay sa nahitabong pagkaguba sa hanging bridge sa Brgy. Lugdungan kagahapon sa hapon, Hunyo14 ning tuiga, mihimo sa hinanaling inspeksyon ang kagamhanang lokal sa Dipolog kaganihang buntag, Hunyo 15, 2023 sa maong dapit.

Si Bise-Mayor Senen O. Angeles kinsa maoy Acting City Mayor ning higayona,   ang personal nga ngangulo sa nasangpit nga inspeksyon kauban nila si City Planning and Development Coordinator, Engr. Albert A. Alimpulos ug City Engineer, Engr. Susan B. Ualat  uban sa pipila ka personahe gikan sa City Information Office ug City Engineering, tanan ning siyudad.

Atol sa gipahigayong inspection, nakita nga naputol ang main cable sa wala (left) nga bahin sa hanging bridge kon mopadulong sa sentro sa Brgy. Lugdungan nga maoy nagdala sa kusog niini hinungdan nga kini nahugno.

Tungod ning maong insidente, ug aron nga mahimo ang dinali-ang pag-ayo sa maong tulay, gimando sa Bise-Mayor ngadto sa buhatan sa City Engineering nga hatagan kini og hinanaling kasulbaran pinaagi sa paghimo dayon sa “Program of Works” aron mapalit sa pinaka-madaling panahon ang mga materyales nga gikinahanglan, partikular na ang cable nga maoy nagdala sa kusog niini ug masugdan na ang dinali-ang pagtrabaho aron mapahimuslan kini pagbalik sa mga lomolopyo sa Barangay Lugdungan.

Ning kasamtangan, ang mga katawhan sa barangay ang gi-awhagan nga adto lang ona moagi sa alternatibong dalan nga temporaryong agi-anan sa tagi-barangay dinha sa kilid sa Lugdungan Elementary School padulong na sa Purok Balintawak labang ngadto sa duha  ka sapa, nga gitrabaho sa Department of Public Works and Highways (DPWH), samtang pagahimoon ang pagkomponi sa nasangpit nga tulay sa  unahan.

Dugang usab nga nasayran atol ning pagbalita, nga wala gihapon gihikling sa pamuno-an sa kagamhanang lokal ning siyudad, ilawom sa pagdumala ni City Mayor Darel Dexter T. Uy ug mga opisyales ang laraw alang sa paghimo og usa ka konkretong tulay dinha sa nasangpit nga dapit sa umaabot nga mga adlaw.

Subay ning maong insidente, naghangyo karon ang kagamhanang lokal ning siyudad ngadto sa tanang mga lomolopyo sa Barangay Lugdungan, sa paghatag og diyotay nga pagsabot sa ilang nasinati karong kahasol tungod ning maong hitabo, gumikan kay kini ang gihatagan dayon sa hinanaling aksiyon sa liderato ning siyudad aron kini magamit pagbalik sa pinakamadaling panahon.

(Source: Dipolog City Government Facebook page)

Leave a Reply