Nagmalampuson ang Port of Dipolog Management sa implementasyon sa “Oplan Ligtas Byahe 2023” alayon na sa pag-obserbar sa Semana Santa ning tuiga.
Basi sa komunikasyon nga gipadangat ni Mr. Alejandro June I. Carasig, Port-Manager Designate, nagmalampuson ang nasangpit nga programa tungod usab sa koordinasyon ug suporta sa Philippine Coast Guard (PCG), City Disaster Risk Reduction and Management Office (CDRRMO) ug mga personahe sa Port of Dipolog, kinsa mitabang sa pag-siguro nga ang tanang pasahero luwas ug nagsubay sa mga safety and security measures.
Gisiguro usab nga ang mga “Special Risk Items” nga dala sa mga pasahero ang iturn-over ngadto sa hingtungdan personahe alang sa proper documentation.
Ang tanang pasilidad sa Passenger Terminal Building (PTB) ang gisusi aron masigurong hapsay ang dagan niini samtang gilantaw usab nga walay aberya dinha sa paghatod ug pagkuha sa mga sumasakay gikan PTB hangtod na ngadto sa barko.
Nasayrang ang PNP mobile personnel ang mibisita usab sa pantalan matag karon ug unya aron masusi ang kahapsay ug kalinaw palibot niini lakip na ang mga kargamento nga moabot sa nasangpit nga pantalan.
(Source: Dipolog City Government Facebook page)