Malampusong gipahigayon ang Overseas Filipino Workers Family Day sa Kalawit, Municipal Gymnasium Zamboanga del Norte isip ikaduhang hugna sa walo ka serye sa OFW Family Day sa tibuok Rehiyon IX.
Gitambongan sa daghang Overseas Filipino Workers (OFWs) ug ilang mga pamilya ang kalihukan nga gitumong sa pagpasalamat ug paghatag-pagpasidungog sa ilang mga sakripisyo ug dakong kontribusyon sa nasud. Ang selebrasyon napasidunggan usab sa presensya ni Honorable Municipal Mayor Arcel C. Antojado, nga mipadayag sa iyang suporta ug pagdasig alang sa mga OFW nga giila isip modernong mga bayani.
Sumala sa mga tigpasiugda, ang maong kalihukan usa ka pamaagi sa pagpalig-on sa panaghiusa sa komunidad ug sa paghatag bili sa papel sa mga OFW ug ilang mga pamilya sa kalamboan sa lokal ug nasudnong ekonomiya.
Gipahayag sa mga organizer ang ilang pasalamat sa tanang OFW ug pamilya nga mitambong, ug gipasiugda nga magpadayon ang mga kalihukan nga nagpunting sa kaayohan ug kahimsog sa mga OFW sa rehiyon.(IKEN B. GULLEM)
Source: OWWA Regional Welfare Office IX