Gipahigayon kaniadtong Enero 28, 2026 sa LGU-Manukan Gymnasium ang ikaduhang coordination meeting alang sa Kalasag-Zamboanga del Norte Inter-Agency Territorial Defense Operations (IATDO) Exercise 01-2026 isip kabahin sa mga preparasyon para sa simulation exercise nga ipahigayon karong umaabot Pebrero 27, 2026.
Gipangunahan ang tigum ni Lt. Col. Jessie G. Bergonia, Commanding Officer sa 97th Infantry “Kalasaglahi” Battalion, 1st Infantry Tabak Division, Philippine Army (PA) uban ang pagtambong sa nagkalain-laing ahensya sa gobyerno aron palig-onon ang koordinasyon, klarohon ang tagsa-tagsa ka papel, ug ayohon ang mga plano sa operasyon.
Mitambong ang mga representante sa Philippine Army, Philippine Air Force, PNP, Philippine Coast Guard, Bureau of Fire Protection, Office of Civil Defense-9, DILG Zamboanga del Norte, ug ang mga nagkadaiyang LGU’s gikan sa Dipolog City, Katipunan, Roxas, Manukan, Jose Dalman ug Sindangan.
Sumala sa agenda nga gipresentar ni Capt. Rolando H. Ranoco, Operations Officer sa 97IB, gituki sa meeting ang tasking, operational coordination, ug posibleng mga isyu nga angay andamon sa dili pa ang exercise.
Ang sunod nga coordination meeting ipahigayon sa Pebrero 4, 2026, samtang ang opening sa exercise sa Pebrero 9, rehearsal sa Pebrero 25-26, ug ang aktuwal nga simulation sa Pebrero 27, 2026.
Ang IATDO exercise gitumong sa pag-test sa inter-agency cooperation ug pagpalig-on sa kahandam sa rehiyon batok sa mga hulga sa seguridad.(IKEN B. GULLEM)
Source: Zamboanga del Norte Provincial News Network