Nakigtambayayong ang International Center Ministry Foundation (ICM) sa kagamhanang probinsyal pinaagi sa Provincial Health Office (PHO) alang sa pagpangayo ug tabang sa pagpahigayon sa ilang Transform Program.
Sa gipahigayong orientation sulod sa Conference Hall, Provincial Administrator’s Office kalabot sa maong programa uban sa mga personahe sa PHO ug Department of Health (DOH), gipasabot ni Dr, Melinda Kelly, ang Chief Health Officer sa Global Health Strategy, International Care Minsitry nga ang Transform Program usa ka 15-week community-based, holistic education program nga maghatag sa mga kabus sa ilang panginahanglanon aron pagpakigbatok sa kapobrehon.
Dugang ni Dr. Kelly nga kini uban usab sa maayong edukasyon pinaagi sa Values, Health and Livelihood (VHL) Curriculum.
Nasayran nga adunay 23 ka barangay sa Zamboanga del Norte ang ilang napili nga resipiente sa maong programa.
Ingon man, adunay 45 ka mga barangay ang ilang target sa tibuok Zamboanga Peninsula. Sa pagkakaron, sa Zamboanga del Norte, lakip na sa syudad sa Dipolog, aduna na silay napili nga 23 ka mga barangay nga tabangan.
Ang nahisgutang programa, magsugod sa Marso 27 hangtod sa Hunyo niining tuiga.
(Source: Provincial Information Center Zanorte Facebook page)