Gihimong sentro sa bag-ong edukasyon ug health initiatives sa gobyerno ang student well-being atol sa action planning workshop nga gipangunahan sa Department of Education (DepEd) ug Department of Health (DOH) niadtong Mayo 12, 2026 sa Mibang Hotel, Dipolog City.
Naghiusa ang mga opisyal sa edukasyon ug panglawas gikan sa Zamboanga del Norte, Dipolog City, ug Dapitan City aron maghimo og konkretong plano sa pagpalapad sa “Healthy Learning Institutions” program sa mga pampublikong eskwelahan sa Region 9. Gipunting sa workshop ang pagpalig-on sa physical ug mental health support systems alang sa mga estudyante.
Sa iyang mensahe, gipasiugda ni Mark Dominique P. Badiang sa DOH Region 9 nga importante ang pagtan-aw sa learner wellness isip batakang katungod sa matag kabatan-onan. Sumala sa mga education leaders, dili mahimong mahitabo ang epektibong pagkat-on kung walay luwas ug himsog nga learning environment.
Kabahin ang maong programa sa DepEd 5-Point Reform Agenda nga nagtumong sa holistic development sa mga estudyante. Gilauman sa mga ahensya nga pinaagi sa mas lig-on nga school health programs, mahimong mas andam ang mga kabatan-onan sa akademiko ug sa pag-atubang sa mga hagit sa umaabot.(IKEN B. GULLEM)
Source: DepEd Tayo-Division of Dapitan