Gisugdan niadtong Agosto 8, 2026 ang Gutalac Municipal Meet 2026, diin gipasiugda sa lokal nga pangagamhanan ang kahinungdanon sa sports sa pagpalambo sa talento, disiplina ug liderato sa mga kabatan-onan.
Gidasig ang mga atleta nga makigkompetensya nga adunay kasingkasing, integridad ug pagrespeto sa ilang mga kaatbang, samtang gihatagan og gibug-aton nga labaw sa kadaugan ang mga leksyon ug kasinatian nga ilang makuha sa kompetisyon.
Gipadayag usab sa LGU ang pagpasalamat ngadto sa mga magtutudlo, coaches, school heads, ginikanan ug mga miyembro sa DepEd tungod sa ilang padayong suporta ug paggiya sa mga atleta.
Ubos sa pagpangulo ni Municipal Mayor Eddie Justin Quimbo, mipasalig ang LGU Gutalac nga ipadayon ang pagsuporta sa mga programa ug oportunidad nga makatabang sa pagpalambo sa talento, pangandoy ug potensyal sa mga kabatan-onan sa lungsod.
Gipasiugda sa lokal nga pangagamhanan nga ang pagpamuhunan sa kabatan-onan usa usab ka pagpamuhunan sa kaugmaon sa Gutalac, ilabina pinaagi sa mga programa nga makapalambo dili lamang sa ilang abilidad sa sports, kondili usab sa disiplina, panaghigalaay ug liderato.(IKEN B. GULLEM)
source: LGU GUTALAC-PUBLIC INFORMATION