Duha ka importanteng kabalaka sa komunidad—ang peligro sa baybayon ug limitadong suplay sa tubig—ang nasuta atol sa community walkthrough ug risk mapping sa Barangay Banigan, Liloy niadtong Agosto 8, 2026.
Gipahigayon ang Validation of Community Profile, Community Walkthrough ug Risk Mapping diin giila sa Barangay Resilience Team (BResT) ang usa ka lugar duol sa baybayon nga mahimong maapektuhan kung adunay katalagman, ilabina kung moabot ang tsunami sa barangay.
Matud sa mga residente, usa sa mga hagit sa pagpatuman og risk-reduction measures sa maong lugar mao nga pribado ang yuta, busa limitado ang mahimo sa barangay sa pagplano ug pagpatuman og mga interbensyon.
Nasuta usab atol sa community walkthrough nga daghang residente sa Banigan ang nagsalig sa pagpanguma isip panginabuhian.
Samtang adunay water system ang barangay, pipila ka purok ang nag-atubang gihapon og problema sa suplay sa tubig. Lakip sa giila nga hinungdan mao ang taas ug daan nang mga hose nga gigamit sa paghatod sa tubig, diin ang uban adunay mga leaks nga nakaapekto sa regular nga agas sa tubig ngadto sa mga panimalay.
Pinaagi sa maong assessment, gihatagan og higayon ang BResT ug mga residente nga tukion ang aktuwal nga mga risgo ug panginahanglan sa komunidad aron mahimong basihan sa pag-andam sa angay nga mga lakang alang sa disaster preparedness ug community resilience.(IKEN B. GULLEM)
Source: Kalahi CIDSS Liloy