Malipayong nakadawat ang mga estudyante sa Guimputlan Integrated School sa Gugma Ayuda ni Governor Rosalina “Nanay Nene” Jalosjos, kaganihang alas 3 sa hapon atol sa gipahigayong Brigada Skwela 2023.
Pinaagi sa Ayuda Team ug buhatan sa Provincial Disaster Risk Reduction and Management Office (PDRRMO), nakadawat ug 230 ka mga school supplies gikan sa kindergarten, hangtud sa mga highschool students sa maong tulunghaan diin aduna kini bag, notebook, tahal o sharpener, crayons, lapis alang sa elementary ug ballpen alang sa highschool ug raincoat.
Si Lyra L. Balladares, Principal I sa maong tulunghaan kini nagkanayob nga nagmalipayon ug mapasalamaton sila ni Governor Nanay Nene tungod kay dako kaayong natabang sa mga estudyante sa Guimputlan Integrated School ilabina sa gipanghatag nga raincoat nga proteksyon sa mga estudyante panahon sa ting-ulan.
Dugang pa ni Balladares, dili lang kini ang unang higayon nga sila nakadawat ug ayuda gikan sa kagamhanang probinsyal, maong dako kaayo iyang pasalamat ilabi na usab sa mga personahe sa Ayuda Team nga maayong nag-abi-abi kanila.
Mapasalamaton usab si Janelle Hablo, umaabot nga Grade 10 student sa Guimputlan Integrated School sa mga gipanghatag nga mga school supplies nga ilang magamit karong sugod abri sa klase ug nanghinaot siya nga dili lang kini ang katapusang pagpanghatag sa gobernadora sa ilang tulunghaan, subay sa panultihon ni Nanay Nene, “Misyon ko, Tinuod nga serbisyo”. (PIC-Rosella Aba-a & Jeffrey Lacay – Photographer)